Stimpilgjöld skila 9 milljörðum

Stimpilgjöld skiluðu tvöfalt hærri fjárhæð í ríkissjóð í fyrra en áætlað var. Þessi skuldaskattur skilaði fjórum komma fimm milljörðum meira en vænst var, aðallega vegna skuldbreytinga íbúðalána. Engin merki eru um að þessi skattur verði afnumin þrátt fyrir að leiðtogar stjórnarflokkana hafa kallað hann "úreltan og gamaldags hortitt".

Á ársfundi ráðgjafastofu um fjármála heimilanna í gær var lögð á það áhersla að stimpilgjöld af lántökum yrði afnumin - ekki að undra enda stendur það í fólki að borga tugi þúsunda fyrir það eitt til dæmis að skuldbreyta láni. Að skattleggja lántökur eða skuldir með þessum hætti er skrítið fyrirkomulag - og hefur verið til skoðunar lengi að afnema þennan skatt.

Landsfundur sjálfstæðismanna lagði til breytingar á þessu kerfi árið 2001 og síðan þá hafa breytingar verið gerðar - en einkum og sér í lagi útfrá hagsmunum fyrirtækjanna. Einstaklingar þurfa enn að borga 150 þúsund kall í skatt af 10 milljón króna lántöku.

Síðustu misseri hafa orðið miklar hræringar á íbúðalánamarkaði með miklum endurfjármögnun og ríkissjóður hefur grætt á tá og fingri af skuldaskattinum. 2004 var skatturinn hátt í tövfallt meiri en árið 2003 og á síðasta ári fékk ríkissjóður rúma níu milljarða útúr þessum skattstofni. Ríkið hafði ekki búist við nema 4,6 milljörðum. Í ár er enn búist við því í fjárlögum að stimpilgjöldin skili 6 miljörðum - og það ætti að nást ..og ef til vill gott betur því fyrstu þrjá mánuði ársins skiluðu stimpilgjöldin tveim komma tveimur milljörðum.

Pólitískan vilja virðist ekki vanta í orði til að afnema þessa skatta. Þannig ályktaði landsfundur um þetta skildi gert núna síðasta haust ... eins og landsfundur gerði 2001. Halldóri Ásgrímssyni kallaði þennan skatt "hortitt" í fyrra - spurning svo sem hvort 9 milljarðar teljast ekki nokkuð feitur hortittur. Geir H Haarde hefur varla skipt um skoðun en fyrir 6 árum kallaði hann stimpilgjöldin frumstæðan og gamaldags - skatturinn varla orðin nútímalegri nú sex árum síðar.

Margrét Frímannsdóttir flutti frumvarp um afnám þessa skatts eða í það minnsta afnám við endurfjármögnun fyrir vorið 2005. Stjórnarliðar svæfðu málið í nefnd.

..þar sem það sefur enn.