Kópavogur tilnefnir heiðurslistamann

Erna Ómarsdóttir dansari og danshöfundur var nú rétt í þessu útnefnd heiðurslistamaður Kópavogs. Erna er yngsti listamaðurinn sem hlotið hefur þennan heiður í Kópavogi, en hún þykir hafa náð langt í listsköpun sinni og verið landi og þjóð til sóma.

Erna er 34 ára gömul og uppalin í Kópavoginum þar sem hún hóf dansnám sitt. Hún hefur verið tilnefnd og unnið til fjölda verðlauna fyrir list sína á undanförnum árum og víða vakið athygli. Erna var til að mynda tilnefnd til Benoit dansverðlaunanna í Moskvu 2002 og sama ár var hún valin sem einn besti ungi dansarinn af Ballet International. Árið 2003 var hún valin einn besti dansarinn sem og einn þeirra ungu danshöfunda sem vert er að fylgjast með.

Árið 1996 stofnaði Erna ásamt þremur öðrum dönsurum Dansleikhús með Ekka í Reykjavík og hefur hún dansað og samið mörg verk fyrir hópinn. Erna blandar gjarnar saman listgreinum og er meðal annars meðlimur í fjöllistahópnum PONI sem starfar í Belgíu. Hún hefur einnig skapað verk í samstarfi við Jóhann Jóhannsson, Gabríelu Friðriksdóttur og Margréti Söru Gunnarsdóttur.

Erna samdi auk þess dansleikhúsverkið Við erum öll Marlene Dietrich FOR, ásamt leikstjóranum Emil Hrvatin, en sýningin hefur fengið mikið lof gagnrýnenda. Sýningin verður sýnd á Listátíð Reykjavíkur 15. 16. og 17 maí n.k.