Forseta líkt við einræðisherra

Mörður Árnason rifjaði upp að í tíð Rómaveldis hefði sá möguleiki verið fyrir hendi að kjósa diktator til að fara með vald þingsins á óvissutímum, svo sem þegar stríð geisaði eða efnahagurinn var í uppnámi. Diktator þessi réð því þá hvað væri gert og hvaða mál væru til umfjöllunar.

"Ég sé ekki betur en að nú hafi sá voði færst að þjóðinni að forseti þingsins hafi með svipuðum hætti tilnefnt sjálfan sig diktator yfir Alþingi Íslendinga og kosið sjálfan sig.." sagði Mörður og komst ekki lengra því þá stóð forseti þingsins upp úr sæti sínu og sló í bjölluna.

"Forseti gerir athugasemd við þennan málflutning hjá háttvirtum þingmanni og beinir honum að lesa og kynna sér þingsköp Alþingis;" sagði Sólveig Pétursdóttir þingforseti. "Þar sem kemur ótvírætt fram hvaða vald forseti Alþingis hefur til þess að setja mál á dagskrá hér og annað því um líkt."

Skilur ekki forseta

"Forseti, ég skil ekki þessa athugasemd og get því ekki farið eftir henni," svaraði Mörður. "Það sem ég segi er það að ég sakaði forseta alls ekki um að hafa ekki farið að þingsköpun frekar en ég sakaði senatið um það á sínum tíma í Róm að hafa ekki haft leyfi til að kjósa þennan diktator. Þeir kusu diktatorinn og hér hefur forseti þingsins tekið sér það vald að kjósa sjálfan sig sem diktator. Diktator sem kippti úr sambandi starfsáætluninni, sem ekki hefur samráð við þingflokksformenn um störf þingsins og setur sjálf, án nokkurs samráðs, á dagskrá þau mál sem henni þykja brýnust."

Ekki virtist forseti skilja Mörð betur en Mörður skildi forseta.

"Forseti hlýtur nú að velta fyrir sér hvaða tilgangi þjónaði þessi málflutningur hjá háttvirtum þingmanni," sagði forseti þingsins og spurði "hvort það eigi að skilja það svo að forseti sé með ofbeldi þegar á dagskrá þingsins er tekið stjórnarfrumvarp sem er afgreitt með eðlilegum hætti, með þingmeirihluta út úr menntamálanefnd þingsins?"

Hart tekist á

Þetta var ekki eina skiptið sem þingforseti sá ástæðu til að gera athugasemdir við málflutning þingmanna. Nokkrum sinnum vandaði hann fyrir þeim að halda sig við efnið, sem væri athugasemdir við störf forseta, þegar þeir þóttu fara út í efnislega umræðu og álíka oft gerði forseti grein fyrir ástæðum sínum að máli þeirra loknu.