Ungt fólk bjartsýnt á framtíðina

Ungt fólk á Íslandi er upp til hópa bjartsýnt á framtíðarhorfur sínar í heimi hnattvæðingar og alþjóðlegrar samkeppni, ef marka má niðurstöður könnunar sem Samtök atvinnulífsins létu gera á dögunum. Liðlega átta af hverjum tíu hugnast betur að starfa hjá einkafyrirtæki en hinu opinbera og þá eru jeppar og einkaþotur þau farartæki sem ungmennum hugnast einna best.

Samtök atvinnulífsins létu um mánaðamótin síðustu gera könnun meðal 19-20 ára Íslendinga um framtíðaráform þeirra og viðhorf til hnattvæðingar, alþjóðlegrar samkeppni og samkeppnishæfni Íslands. Í ljós kom að 78 prósent ungmennanna vilja helst starfa hjá einkafyrirtæki í framtíðinni, þar af um 37 prósent sem eigin herrar.

Samtök atvinnulífsins telja þetta vott um mikinn frumkvöðlaanda hér á landi en þá vaknar sú spurning hvernig eigi að beisla hann. Gústaf Adolf Skúlason, fostöðumaður stefnumótunar- og samskiptasviðs hjá SA, segir að það megi gera með því að halda áfram að fela einkageiranum sem mest af þeirri þjónustu sem ríki og sveitarfélög veita núna. Þarna sjái krakkarnir sín tækifæri.

Þá vekur það athygli að um helmingi þeirra ungmenna sem tók afstöðu í könnuninni telur jeppa besta farartækið. Þar á eftir koma góðir skór og einkaþota, en einn af hverjum átta á sér þann draum að ferðast um í slíku lúxusfarartæki. Einungis átta prósent nefna hins vegar reiðhjól. Aðspurður hvort verið sé að ala upp nýja Björgólfa Thora hér á landi segir Gústaf að vonandi sé svo.