Mál­flutningur í Baugs­málinu hafinn

Töf varð á réttarhaldi í Baugsmálinu við upphaf þinghalds í Héraðsdómi í morgun þegar settur saksóknari lagði fram ný gögn varðandi bílainnflutning Baugsfjölskyldunnar. Reiknað er með að málið verði dómtekið síðar í dag.

Gögnin sem Sigurður Tómas Magnússon, settur saksóknari í málinu, lagði fram við upphaf þinghalds tengjast innflutningi á fjórum bílum frá Bandaríkjunum sem deilt er um í fjórum ákæruliðum af átta. Þeirra var aflað frá bifreiðaskráningu í Kanada, sem er upprunaland einnar bifreiðarinnar, og sýna fram á að hún hafi verið afskráðir þar og taka af vafa um vélarnúmer bifreiðarinnar.

Verjendur mótmæltu framlagningu gagnanna harðlega og var því gert hlé á aðalmeðferð í tuttugu mínútur svo verjendur gætu kynnt sér gögnin. Mótmælin voru síðan dregin til baka en saksóknari hafði fullyrt að ekki yrði byggt á gögnunum.

Saksóknari hóf síðan málflutning sinn og fór yfir ákæruliðina átta sem eftir standa í málinu. Þeir varða brot á lögum um ársreikninga og almennum hegningarlögum vegna lánveitinga Baugs til tengdra félaga og aðila og tollalagabrot vegna innflutnings notaðra bíla.

Sigurður Tómas gat þess sérstaklega að verið væri að fara yfir þá 32 ákæruliði sem vísað var frá dómi fyrir áramót og kannað hvort aftur yrði ákært í þeim. Hann tók einnig sérstaklega fram að sjálfstæði lögregla og ákæruvalds hefði verið virt fullkomlega á meðan rannsókn fór fram og ákært var í málinu. Hann sagði rannsóknina hafa tekið nokkurn tíma hjá efnahagsbrotadeild ríkislögreglustjóra en líkfundarmálið svonefnda hefði meðal annars tafið fyrir henni.

Málflutningur verjenda í málinu hefst eftir hádegi en áætlað er að honum ljúki síðdegis í dag og verður málið þá dómtekið. Búast má við dómi í málinu innan þriggja vikna.