Konur hugsi betur um hjartað

Alþjóðahjartasamtökin ýta í dag úr vör kynningu og átaki til að vekja konur til meðvitundar um að hjata- og æðasjúkdómar séu ein helsta dánarorsök kvenna á heimsvísu líkt og karla. Hér á landi hefur Hjartavernd látið til sín taka í málinu, en samkvæmt bráðabirgðatölum Hagstofunnar frá árinu 2004 létust tæplega 300 konur af völdum hjarta- og æðasjúkdóma en um 250 af völdum illkynja æxlis.

Ætlunin er auk þess að kenna konum að þekkja helstu áhættuþætti hjarta- og æðasjúkdóma en tíðni þeirra eykst eftir því sem konur eldast og á ákveðnum aldri ná þær körlum í tíðni sjúkdómanna. Bylgja Valtýsdóttir, upplýsingafulltrúi Hjartaverndar, segir konur almennt búa við falskt öryggi um að þær fái ekki hjartasjúkdóma og þurfi ekki að láta mæla kólesteról eða blóðþrýsting. Svo einfalt sé málið ekki og konur þurfi að þekkja þessa þætti.

Til þess að hafa hjartað í lagi þarf meðal annars að hreyfa sig, gæta að mataræðinu, fylgjast með blóðþrýstingi og kólesteróli og reykja ekki. Bylgja segir einnig mikilvægt að konur láti kanna áhættuþætti sína. Hjá Hjartavernd sé hægt að panta tíma fyrir áhættumat þar sem fram fari mælingar á helstu áhættuþáttum. Þar sé innifalið viðtal við lækni þar sem reiknaðar séu líkurnar á áfalli á næstu tíu árum út frá hjartareiknivél Hjartaverndar. Fólki sé beint inn í heilbrigðiskerfið ef þurfa þyki. Mikilvægt sé að komast að því hver staðan sé.