Þakið rifið af stúku Laugardalsvallar

Sjö tonn af stáli og timbri svifu um loftið í Laugardalnum um kvöldmatarleytið þegar starfsmenn Ístaks voru á fullu við að rífa þakið á gömlu stúkunni á Laugardalsvelli.

Og það er ekki hlaupið að því að búta þakið niður og fjarlægja flekana. Tveir voru teknir niður í dag og vinna við að losa þann síðari hófst laust fyrir klukkan þrjú. Vírar voru festir í þakið og starfsmenn unnu í þrjár klukkustundir við að logsjóða málmbita í þakinu sundur áður en hægt var að lyfta því og setja til hliðar. Stjórnandi verksins gerir ráð fyrir að það geti tekið tvær vikur að fjarlægja allt þakið, en það fer eftir veðri og hvernig verkið gengur.

En hvað finnst vallarstjóranum um að sjá þakið hverfa? "Ég veit að það kemur svo gott í staðinn að það er enginn söknuður," segir Jóhann G. Kristinsson vallarstjóri. Hann segir þak gömlu stúkunnar hafa valdið sér áhyggjum um margra ára skeið þar sem vírnet sem var sett í þak stúkunnar þegar hún var byggt hafi verið farið að hrynja niður og því hefði hann óttast að það lenti á fólki ef það félli á kappleikjum. Upphaflega var vírnetið sett í þakið til að varna því að fuglar gerðu sér hreiður í þakinu.

Jóhann segir nýju stúkuna gjörbylta vellinum, hvort tveggja fyrir stuðningsmenn sem fengju betri sæti og betri salernisaðstöðu og fyrir sambandið sem væri betur í stakk búið að taka á móti fólki og kæmi meðal annars upp svokölluðum VIP-boxum, eða aðstöðu fyrir þá stuðningsmenn landsliðsins sem væru reiðubúnir að greiða þeim mun meira fyrir aðgang á völlinn.