Ekki seinna að vænna að jafna stöðuna

Það gæti verið gaman að jafna aðeinsstöðuna gagnvart Borís Spasskí segir Friðrik Ólafsson um skákir þeirra á morgun. Hann segir málþingið um feril sinn þó aðalatriðið og vonar að vinur sinn Spasskí verði ekki of harður í dómum um sig.

Það bíða eflaust margir spenntir eftir skákeinvígi Friðriks Ólafssonar, fyrsta íslenska stórmeistarans, og Bórísar Spasskís, fyrrum heimsmeistara. Einvígið verður einn af hápunktunum á málþingi um arfleifð Friðriks í skáklistinni. Spasskí verður meðal þeirra sem fjalla um feril Friðriks á málþinginu.

"Ég vona að hann verði ekkert harður í dómum," segir Friðrik um Spasskí. "En við erum góðir vinir og ég veit að hann fer um þetta nærfærnum höndum."

"Það er náttúrulega ekki seinna að vænna að jafna aðeins sakirnar. En þetta er meira til gamans gert og ekki aðalatriðið í þessari uppákomu á morgun. Það er að fara aðeins yfir minn feril og taflmennsku."

Vinnustofa Friðriks ber þess merki að skákin á enn sterk ítök í honum. Skákbækur, viðurkenningar og minjagripir eru fyrirferðarmikil að ógleymdu taflborðinu sem þar er auðvitað að finna.