Mikil áhersla á álver getur skaðað aðrar útflutningsgreinar

Mikil áhersla stjórnvalda á álver getur skaðað aðrar útflutningsgreinar sem gefa meira í þjóðarbúið. Þetta sagði Ágúst Guðmundsson, stjórnarformaður Bakkavarar, á viðskiptaþingi í dag.

Ágúst sagði í erindi sínu á Viðskiptaþingi í dag að fjárfesting í menntun og þekkingu væri einhver sú arðsamasta fjárfesting sem Íslendingar geta farið í. Sú skoðun væri hins vegar ríkjandi hér á landi að framleiða þurfi eitthvað áþreifanlegt, ekki sé hægt að lifa af þekkingu og þjónustu.

Þannig spurði Ágúst í erindi sínu að því hvaða útflutningsgreinar muni þola áratugar nær samfellda uppbyggingu í stóriðju. Afleiðingin gæti orðið sú að útflutningur eykst í raun og veru ekki neitt þegar upp verður staðið, heldur færist útflutningsframleiðslan á milli greina. Þannig gætu þær útflutningsgreinar horfið á braut sem byggja á þekkingu og hugviti og hafa háan virðisauka.

Ágúst segir það mýtu að íslenskt hagkerfi þurfi á álverum að halda til að vaxa. Hann sagði að jafnvel þó að Íslendingar nái því að komast í hóp stærstu álframleiðanda heims og myndu virkja alla hagkvæmustu virkjunarkosti landsins, myndi arðsemi þess og hagur fyrir íslenskt samfélag, aldrei verða meiri sem nemur framlagi eins öflugs útflutningsfyrirtækis