Úthlutað fyrir lok umsóknarfrests

Umhverfisráðherra hefur úthlutað Náttúrufræðistofnun 6,6 milljónum króna úr veiðikortasjóði þrátt fyrir að umsóknafrestur um styrki úr sjóðnum sé ekki runninn út.

Inn á vef Umhverfisráðuneytisins er auglýst eftir umsóknum um styrki úr veiðikortastjóði til rannsókna á stofnun villtra fugla og spendýra. Leyfisgjald sem veiðimenn greiða rennur í veiðikortasjóð og á að nota hann til rannsókna og til að reka veiðistjórnunarsvið Umhverfisstofun. Umhverfisráðherra á að úthluta úr sjóðnum að fengnum tillögum Umhverfisstofnunar.

Umsóknafrestur rennur út 15. febrúar næstkomandi en þrátt fyrir það úthlutaði ráðherra 6,6 milljónum úr sjóðnum til Náttúrufræðistofnunar þann 30. desember síðastliðinn. En það er þvert á álit umboðsmanns Alþingis frá árinu 2004 þar sem hann gangrýndi fyrri úthlutun ráðuneytisins úr veiðikortasjóði til Náttúrfræðistofnunar. Í álitinu kemur fram að rétt sé að Umhverfisstofnun auglýsi eftir umsóknum um styrki úr sjóðnum og geri tillögur til ráðuneytisins.

Nú eru um sex milljónir eftir til úthlutunar í stað um tólf milljóna og þeir sem eru að skrifa umsóknir núna eða eiga eftir að gera það eiga ekki jafna möguleika á við Náttúrfræðistofnun að fá fé úr sjóðnum.

"Það hljóta að vera mistök. Ég get ekki betur séð en að menn verði að endurskoða þessa ákvörðun," segir Sigmar B. Hauksson, formaður Skotvís. "Við höfum barist fyrir því í hartnær níu ár að það sé auglýst og að menn sæki um í sjóðinn. Ég veit ekki betur en að núverandi umhverfisráðherra og sá fyrri hafi verið sömu skoðunar. Þessi úthlutun á að vera gegnsæ."

Ingimar Sigðursson, skrifstofustjóri í Umhverfisráðuneytinu, segir ákvörðun um úthlutun á fénu byggja á áætlun sem ráðuneytið samþykkti árið 2002 og tekur til áranna 2003-2007. Úthlutunina segir hann vera hluta af kostnaði við rjúpnarannsóknaverkefni og sé raunverulega til þess að mæta þeim kostnaði sem ekki er mætt í fjárveitingum til stofnunarinnar. Hann segir málið hafa verið afgreitt í framhaldi af umsögn Umhverfisstofnunar.