Gestkvæmt hjá nýbura

Halldór Ásgrímsson forsætisráðherra og Hallgrímur Snorrason hagstofustjóri voru ekki einu ráðamennirnir sem heimsóttu son Erlu Maríu Andrésdóttur og Haraldar Arnarsonar sem varð 300 þúsundasti landsmaðurinn í dag. Það gerði líka Árni Sigfússon, bæjarstjóri í Reykjanesbæ - heimabæ drengsins, og hann kom færandi gjafir.

Á vef Reykjanesbæjar kemur fram að Árni færði foreldrum drengsins gjafakörfu frá Kaffitári auk gjafabréfs frá miðbæjarsamtökunum Betri bæ upp á 30 þúsund krónur. Þá fengu þau bókina Hversu mikið er nóg sem öll nýfædd börn í Reykjanesbæ fá frá bænum.

Til stendur að móðir og barn verði flutt á fæðingardeildina við Heilbrigðisstofnun Suðurnesja á morgun en þau dveljast á fæðingardeild Landspítala háskólasjúkrahúss í Reykjavík.