Andri Snær valinn á fyrirlestraröð í Columbiu-háskóla

Andri Snær Magnason rithöfundur hefur verið valinn einn af fimm fyrirlesurum til að ávarpa nemendur í Columbia-háskóla í Bandaríkjunum. Fyrirlestraröð vorannar er undir yfirskriftinni „Orð og gjörðir". Aðrir fyrirlesarar verða George Bizos, lögfræðingur Nelsons Mandela, George D. Yancopoulos, læknir, doktor í lífefnafærði og sameindalíffræði og forstjóri líftæknifyrirtækisins Regeneron, Peter Goldmark, stjórnandi Environmental Defense Fund, óopinberra umhverfissamtaka í New York, og Stewart Sukuma, tónlistar- og baráttumaður frá Mósambík.

Columbiu-háskólinn er einn virtasti háskóli í heimi. Á hverri önn eru mánaðarlegir fyrirlestrar sem eru ætlaðir afburðanemendum skólans og styrkþegum sem sýnt hafa eindregna hæfni til að axla leiðtogahlutverk í framtíðinni. Á hverju skólaári eru fengnir fyrirlesarar hvarvetna úr heiminum í því skyni að kynna þeim sem flest sjónarmið í samfélagsmálum, stjórnmálum, vísindum og listum. Markmiðið er að auka víðsýni nemendanna, brýna hugsjónir þeirra og veita þeim nýja sýn á heiminn og vandamál hans. Margir af helstu og þekktustu forvígismönnum bandarísks efnahagslífs, háskóla og stjórnmála hafa á undanförnum árum verið þátttakendur í þessu námi.

Andri Snær Magnason hefur þrátt fyrir ungan aldur markað sér stöðu sem einn helsti rithöfundur Íslendinga. Blái hnötturinn fékk í vor fimm tilnefningar til helstu leiklistarverðlauna Kanada og er væntanleg á svið í Finnlandi í september. Fyrir Söguna af bláa hnettinum hlaut hann Íslensku bókmenntaverðlaunin 1999 en skjáldsagan LoveStar var tilnefnd til sömu verðlauna árið 2002. Ferill hans spannar vítt svið og verk hans hafa alla jafna vakið athygli fyrir nýjungar í framsetningu og hugmyndaauðgi þar sem hefðbundin viðfangsefni og hugmyndir eru skoðaðar í nýju ljósi. Væntanleg er á næstunni ný bók eftir hann sem er ætlað að hrista upp í hugmyndaheimi og heimsmynd Íslendinga. Verk hans hafa verið gefin út á 17 tungumálum.