Heilbrigðisráðherra gerir samning um 600 biðlistaaðgerðir

Heilbrigðismálaráðherra hefur gert samning við fjórar heilbrigðisstofnanir um tæplega sex hundruð svokallaðar biðlistaaðgerðir á árinu. Samningurinn er gerður til að stytta biðtíma sjúklinga sem bíða eftir tilteknum læknisaðgerðum og stofnanirnar sem í hlut eiga eru Landspítali - sjúkrahús, Fjórðungssjúkrahúsið á Akureyri, St. Jósefsspítali í Hafnarfirði og Heilbrigðisstofnunin Akranesi. Flestar aðgerðirnar eru svokallaðar augnsteinaaðgerðir og fjölgar þeim á árinu um 500 frá því sem gera mátti ráð fyrir í reglulegri starfsemi viðkomandi stofnunar.

Aðrar aðgerðir sem gerðar verða samkvæmt samningnum við stofnanirnar fjórar eru hjartaþræðingar og kransæðaútvíkkun, liðskiptaaðgerðir á mjöð og aðgerðir á hnjám.