Baugsmálið kostar nærri 1.500 milljónir

Aðalmeðferðinni í Baugsmálinu lauk sem kunnugt er í héraðsdómi Reykjavíkur í gær, en nú eru meira en þrjú ár frá því rannsóknin hófst. Það var í kjölfar upplýsinga og ásakanna frá Jóni Geraldi Sullenberger, fyrrum viðskiptafálaga baugsfeðga, um skattsvik og annað sukk og svínarí.

Upphaflega voru ákæruliðirnir 40, en eftir frávísanir og hlaup á milli Héraðsdóms og Hæstaréttar, stóðu átta liðir eftir. Fjórir þeirra vegna frágangs ársreikninga, þar sem deilan stendur um hvort stjórnendur hafi fengið lán frá Baugi, og hins vegar þá, hvernig átti að færa það til bókar. Hinir fjórir voru vegna svindls við innfluting á fjórum bílum.

Fréttastofa hefur ekki fengið uppgefið hversu mikið rannsókn Baugsmálsins eða málshöfðunin kostaði ríkið, og ekki eru ennþá öll kurl komin til grafar, því Sigurður Tómas Magnússon, sérstakur saksóknari í málinu, hefur enn ekki ákveðið hvort hann endurákærir í þeim 32 liðum sem vísað var frá.

Hins vegar má ætla að kostnaður ríkisins sé ekki undir 200 milljónum króna vegna málsins.

En þetta eru þó smáaurar miðað við það sem Baugsmenn þurfa að reiða fram. Þótt ekki er tekið tillit til þess gróða sem Baugur hefur orðið af vegna málaferlanna og hinnar neikvæðu umfjöllunnar, sem Jón Ásgeir hefur sagt að hlaupi á milljörðum.

Eftir því sem fréttastofa kemst næst, munu málsvarnarlaun sexmenninganna sem ákærðir eru í Baugsmálinu, rannsóknarvinna, almannatengsl og annar kostnaður Baugs vegna málaferlanna nema eitt þúsund og tvö hundruð milljónum króna.

Samtals gæti því Baugsmálið kostað meira einn og hálfan milljarð króna.