Furðuleg ástríða fyrir enska boltanum

Leikstjórinn Róbert Douglas er nú að vinna að því að gera heimildarmynd um hina merkilegu ástríðu íslenskra knattspyrnuáhugamanna á enska boltanum sem mörgum þykir alveg séríslenskt fyrirbæri.

Knattspyrnan hefur lengi leikið stóran sess í kvikmyndum Róberts og nægir þar að nefna Strákana okkar sem fjallaði um samkynhneigt knattspyrnulið.

Róbert var staddur í London þegar Fréttablaðið hafði tal af honum og sagði leikstjórinn að verkefnið væri enn á byrjunarstigi.

„Maður fer ekki alveg á fullt svona strax við gerð heimildarmynda,“ segir Róbert. „Ég er að viða að mér efni, hef tekið tvö viðtöl og ætla að tala við menn sem hafa brennandi áhuga á enska boltanum og þá sem hafa tekið virkan þátt í honum,“ segir Róbert en tökuliðið hefur þegar farið í eina ferð út til Englands með íslenska Liverpool-stuðningsmannaklúbbnum og reiknaði fastlega með að fara í fleiri slíkar ferðir.

Samkvæmt heimildum Fréttablaðsins er einn þeirra sem Róbert hefur tekið viðtal við íþróttavöruframleiðandinn Halldór Einarsson, betur þekktur sem Henson, en hann sá meðal annars enska úrvalsdeildarliðinu Aston Villa fyrir búningum.

Áhugi Íslendinga á ensku úrvalsdeildinni hefur síst minnkað eftir að Eggert Magnússon og Björgólfur Guðmundsson yfirtóku West Ham og verður því forvitnilegt að sjá hvaða augum Íslendingar sjá ást sína á enskri knattspyrnu.