Bið margra barna styttist

Nýr samstarfssamn­ingur Barna- og unglingageð­deildar Landspítala-há­skólasjúkrahúss og Miðstöð heilsu­­­­­verndar barna mun stytta biðtíma margra barna eftir þjónustu á BUGL.

Markmið samningsins er að stuðla að bættri þjónustu við börn með hegðunar- eða geðvanda og fjölskyldur þeirra með því að auka aðgengi að sérhæfðri greiningu, meðferð og eftirfylgd innan heilsugæslunnar. Þetta dregur úr álagi á þá þjónustu sem veitt er frá BUGL.

Undanfarin ár hefur Þroska- og hegðunarsvið Miðstöðvar heilsuverndar barna sinnt greiningu vegna gruns um frávik í þroska eða hegðun barna á aldrinum 0-6 ára.

Með þessum nýja samningi við BUGL verður þjónustan aukin vegna barna með vandamál svo sem ofvirkni, athyglisbrest og aðrar hegðunar- eða lyndistruflanir, sérstaklega hvað varðar ráðgjöf og eftirfylgd auk greiningar. Þessi aukna þjónusta mun einnig standa til boða fyrir börn í fyrsta bekk grunnskóla og stefnt er að því að efla hana og auka eftir því sem fjárveitingar frá ráðuneyti heilbrigðismála leyfir, að því er fram kemur hjá Gyðu Haraldsdóttur, sálfræðingi og sviðsstjóra Þroska- og hegðunarsviðs Miðstöðvarinnar.