Flytjum helst út lyf til Suður-Afríku

Ráðherrafundur EFTA-ríkjanna lauk á Höfn í Hornarfirði í gær. Á fundinum var fríverslunarsamningur EFTA við Tollabandalag Suður-Afríkuríkja undirritaður en þetta er fyrsti fríverslunarsamningurinn sem EFTA-ríkin gera við Afríkuríki sunnan Sahara.

Ísland fer nú með formennsku í EFTA og stýrði Valgerður Sverrisdóttir utanríkisráðherra fundinum á Höfn. "Þetta er sextándi fríverslunarsamningurinn sem EFTA gerir og allir þessir samningar ganga út á það að gera viðskipti auðveldari á milli þjóða og það er okkur Íslendingum mjög mikilvægt að svo sé, þar sem við byggjum svo mjög á innflutningi og útflutningi.

Þess vegna er þetta eitt jákvætt skref sem þarna er tekið, og á eftir að koma í ljós hversu miklu máli það skiptir okkur Íslendinga," segir Valgerður Sverrisdóttir utanríkisráðherra.

Íslendingar flytja aðallega út lyf og iðnaðarvörur til Suður-Afríku en síðastliðin þrjú ár höfum við flutt út lyfjavörur fyrir um hundrað milljónir á ári. Frá SuðurAfríku er mest flutt inn af ávöxtum og grænmeti en einnig nokkuð af drykkjarvörum og tóbaki en það er undir innflytjendum hér á landi komið hvað verður flutt inn. Löndin sem tilheyra tollabandalaginu eru Suður-Afríka, Botsvana, Lesótó, Namibía og Svasíland.

EFTA-ríkin eiga einnig í fríverslunarviðræðum við meðal annars Egypta og Taílendinga og er áhersla lögð á að tengslin við Asíu. "Það er mikil áhersla lögð á Asíu, það eru mjög spennandi hlutir að gerast þar og reiknað með miklum framgangi þar á næstu árum og áratugum, þannig að það skiptir okkur máli að gera fríverslunarsamning við ríki í Asíu," segir Valgerður.

Valgerður sat einnig fund með sendinefnd frá samtökum atvinnurekenda í Japan ásamt Odd Erik­sen, viðskipta- og iðnaðarráðherra Noregs, og William Rossier, framkvæmdastjóra EFTA.

Enginn fríverslunarsamningur er á milli EFTA-ríkjanna og Japans en á fundinum var rætt um leiðir til þess að efla samskipti ríkjanna tveggja. "Það er komið af stað og sérstaklega er það gagnvart Sviss eins og málið stendur í dag, sem sagt tvíhliða á milli Sviss og Japans, en hins vegar gerum við okkur vonir um að þau mál muni þróast þannig að það verði gagnvart EFTA-þjóðunum einnig," segir Valgerður.

Aðspurð um áhuga Færeyinga á að hljóta aðild að EFTA segir Valgerður að það mál hafi verið rætt á fundinum. "Það er ekki alveg einfalt mál, en eitthvað sem við munum skoða áfram."