Freyja Amble efst á Krumma

"Þrátt fyrir að skýjað sé í kring, skín sólin beint á keppnisvöllinn eins og geislabaugur," sagði Hulda Geirsdóttir þar sem hún sat í áhorfendabrekkunni á Landsmóti hestamanna á Vindheimamelum í Skagafirði í gær. Þá voru þegar mætt norður um þrjú þúsund manns sem er nokkuð meira en búist var við á fyrsta degi.

"Þetta hefur farið rosalega vel af stað. Það er mikil ánægja með mótssvæðið, keppendur láta vel af keppnisvöllunum enda fallegir og snyrtilegir," bætir Hulda við.

Búist er við að yfir tíu þúsund gestir muni leggja leið sína í Skagafjörðinn í þessari viku og um helgina til að berja augum þá þúsund hesta sem sýndir verða bæði á keppnisvellinum og í kynbóta­sýningum.

"Það er mjög gaman að segja frá því að efsta hryssan í flokki hryssna sjö vetra og eldri kemur úr Sauðárkróksræktuninni. Það er Hvíta-Sunna frá Sauðárkróki og skemmtilegt fyrir heimamenn að byrja mótið svona," segir Hulda glaðlega og klappar duglega fyrir einum af þeim fjölmörgu unglingum sem ljúka keppni. "Keppnin í ungmennaflokki var feikigóð og Freyja Amble er þar langefst á Krumma frá Geldingalæk.

Hún bætir þar upp mistökin frá síðasta móti þegar þau fengu ekki einkunn þar sem knapi var með písk. En nú stefnir hún á sigur," segir Hulda, full landsmótsgleði.