Valgerður vill rannsókn vegna áletrunar á borða

Valgerður Sverrisdóttir iðnaðar- og viðskiptaráðherra hefur sent lögreglustjóranum í Reykjavík bréf vegna áletrunar á mótmælaborða í göngu Íslandsvina síðastliðinn laugardag.

Myndir af borðanum birtust að sögn Valgerðar bæði í fréttum NFS og í Fréttablaðinu á sunnudag, en á honum stóð: "Drekkjum Valgerði en ekki Íslandi". Valgerður gerir þetta að umtalsefni á heimasíðu sinni og spyr hvort allt sé leyfilegt gagnvart ráðherrum eða öðrum, sem vinni skyldustörf sín og framfylgi ákvörðun Alþingis eins og um sé að ræða varðandi byggingu Kárahnjúkavirkjunar. Á spjaldinu sé um hótun um ofbeldi gegn henni, en slíkt varði við almenn hegningarlög og því hafi hún sent lögreglu beiðni um að rannsaka málið.