Sérverslunum, skautahöll og kanaútvarpinu lokað

Nokkrum sérverslunum og skautahöllinni á varnarliðssvæðinu á Keflavíkurflugvelli verður lokað í dag. Á morgun á svo að slökkva endanlega á sjálfu kanaútvarpinu.

Til stóð að loka Miðbylgjuútvarpsstöð Varnarliðsins , eða "kananum", eins og hún var alltaf kölluð, í dag , samkvæmt brottflutningsáætlun bandaríkjahers, en því hefur nú verið frestað til morguns. Fyrr í mánuðinum var háskólaútibúi, kaffihúsi og sérverslun lokað og í næsta mánuði verður stórmarkaðnum Navy Exchange meðal annars lokað.

Kana útvarpsstöðin, sem nú mun heyra fortíðinni til, var geysi vinsæl meðal íslenskra ungmenna, eða allt þar til Rás tvö og Bylgjan komu til sögunnar fyrir um 20 árum. Var það ekki að undra því kaninn sendi út nýjustu og vinsælustu popptónlistina allan sólarhringinn, á sama tíma og að popptónlist var aðeins útvarpað í nokkrar klukkustundir á viku á Ríkisútvarpinu, sem var eina íslenska útvarpsstöðin.

Útsendingar stöðvarinnar náðust vel á Reykjanesi og víða á höfuðborgarsvæðinu. Sunnlendingar, sem ekki náðu henni, hlustuðu í staðinn á Radio Luxemburg og Akureyringar á Ingimar Eydal í Sjallanum.