Rannsókn á meintu landhelgisbroti færeysks togara

Ríkissaksóknari hefur nú til athugunar rökstuðning Landhelgisgæslunnar fyrir því að halda áfram rannsókn á meintu landhelgisbroti færeysks togara á Íslandsmiðum fyrr á árinu, en togarinn slapp í land í Færeyjum.

Samkvæmt samningi Íslands og Færeyja um lögreglusamvinnu var færeysku lögreglunni falið að rannsaka málið þar, en vegna ófullnægjandi gagna þaðan vildi lögreglan hér vísa málinu frá. Þeirri ákvörðun vísaði Gæslan hins vegar til Ríkissaksóknara.

Málið hefur fengið aukið vægi núna eftir að færeyskir vísindamenn staðfesta að um og yfir fjögur þúsund tonn af þorski, sem færeysk skip bera að landi, sé þorskur af íslenskum ættum, ef svo má segja, en það er nær þrefalt meira en þeim er heimilt samkvæmt samningi Íslendinga og Færeyinga um gagnkvæmar veiðiheimildir. Eftir því sem fréttastofa NFS kemst næst liggja færeysku skipin við miðlínuna á millli landanna, í von um að íslenski þorskurinn flakki inn í færeysku lögsöguna, sem mun hafa færst í vöxt. Einnig eru dæmi um að þau hafi farið inn i íslensku lögsöguna, fyrir utan það sem þau mega veiða hjá okkur samkvæmt samningi.

Friðrik J. Arngrímsson, framkvæmdastjóri Landssambands íslenskra útvegsmanna, sagði í viðtali við NFS í morgun að andvirði þessa umframafla Færeyinga næmi um 660 milljónum króna á ári og þurfi Íslendingar að skerða kvóta sinn sem þessum umframveiðum nemi.