TF-LÍF komin að Akureyrinni

TF-LÍF, þyrla Landhelgisgæslunnar, er komin að Akureyrinni EA, en eldur geisar um borð í skipinu 75 sjómílur norðvestur af Látri. Átján manna áhöfn er á Akureynni og sendi hún út neyðarkall tuttugu mínútur yfir tvö í dag.

Reykkafarar voru fluttir með þyrlu Landhelgisgæslunnar og er þeim ætlað að hjálpa skipverjum að ráða niðurlögum eldsins. Þyrla frá danska varðskipinu Triton fer með fleiri slökkviliðsmenn á vettvang og varðskipið Óðinn er á leið að Akureyrinni. Togararnir Júlíus Geirmundsson, Guðmundur í Nesi og Örvar voru nærri Akureyrinni þegar eldurinn kom upp og héldu þegar í átt að skipinu. Júlíus Geirmundsson var fyrstur á vettvang og fluttu dælu yfir í Akureyrina til að aðstoða við slökkvistarf.

Björgunarbátar á Vestfjörðum og Snæfellsnesi hafa verið settir í viðbragðsstöðu. Þyrla varnarliðsins hefur verið kölluð út og bíður á Reykjavíkurflugvelli og er til reiðu ef flytja þarf fleiri reykkafara að Akureyrinni. Akureyrin EA-110 er 900 brúttólesta skuttogari gerður út af Samherja á Akureyri.

Á svæðinu er nú norðaustan 8 til 13 metrar á sekúndu og skýjað en með kvöldinu eru horfur á snjó eða slydduéljum en veður fer kólnandi á þessu svæði. Hitinn núna hefur verið á bilinu 2-4 stig en í kvöld kólnar niður undir frostmark.