Dæmdur í tveggja ára fangelsi fyrir kynferðisafbrot

Tvítugur karlmaður var í dag dæmdur í tveggja ára fangelsi í Héraðsdómi Reykjavíkur fyrir að hafa þvingað stúlku til að hafa við sig munnmök og að hafa reynt að þröngva henni til samræðis.

Atvikið átti sér stað í 2. júlí í fyrra á Humarhátíð á Höfn í Hornafirði en bæði maðurinn og stúlkan voru gestir á hátíðinni og gistu á tjaldsvæðinu þar sem atvikið átti sér stað. Maðurinn og stúlkan hittust á tjaldstæðinu og síðar um nóttina gengu þau saman frá tjaldstæðinu að trjálundi sem er skammt frá. Þar átti atvikið sér stað en maðurinn segir að hann hafi haft munnmök við stúlkuna og með hennar samþykki. Stúlkan hefur fullyrt að maðurinn hafi þvingað hana til munnmaka og gert tilraun til að setja getnaðarlim sinn í leggöng hennar. Að mati dómsins var stúlkan staðföst og trúverðug í frásögn sinni af atburðum. Vitni sem einnig voru á tjaldsvæðinu umrædda nótt, báru fyrir dómi að stúlkan hefði komið hágrátandi og í miklu uppnámi aftur á tjaldsvæðið og greint frá því að sér hafi verið nauðgað. Sálfræðingur bar einnig vitni fyrir dómi og greindi frá því að stúlkan hafi orðið fyrir áfalli sem valdið hafi henni skelfingu og varnarleysi. Hún hafi verið mjög kvíðin og hrædd, óörugg í aðstæðum þar sem hún hafi áður fundið sig örugga, verið viðkvæm, grátgjörn og viljað forðast að hitta fólk. Aldur stúlkunnar kemur ekki fram Í dómnum.

Maðurinn var eins og áður segir dæmdur í tveggja ára fangelsi. Hann var auk þess dæmdur til að greiða stúlkunni eina milljón króna í skaðabætur, og um 800 þúsund krónur í málskostnað.