Fasteignasali opnar bístróbar

Fasteignasalinn Andrés Pétur Rúnarsson hefur opnað veitingastaðinn Bistro á Laugavegi, sem hann á ásamt Jóhönnu S. Ólafsdóttur. „Áður var þetta Blús-barinn en við hreinsuðum allt út og endurhönnuðum allt og innréttuðum upp á nýtt í nútímastíl með speglum, plasmatækjum, svörtum og rauðum stólum en öll borðin eru úr eik,“ segir Andrés Pétur ánægður með útkomuna.

„Matseðillinn er stór og ekkert ósvipaður því sem gerist á Vegamótum, Sólon og slíkum stöðum. Við erum með smárétti frá 490 krónum en svo erum við með heilsurétti, pastarétti og núðlurétti, hamborgara og samlokur,“ segir Andrés en súpa dagsins fylgir öllum réttum í hádeginu. „Við erum með kökur og kaffi á daginn en bjór og áfengi á kvöldin. Um helgar verðum við með stóran „brunch-matseðil“ og boltinn verður í beinni allan daginn á stórum skjáum.“

Andrés og Jóhanna stefna að því að verra með trúbadora á föstudags- og laugardagskvöldum frá hálf ellefu til hálf tvö eða tvö. „Við byrjum líklega á því um næstu helgi en við erum ekki enn búin að vera með formlega opnun heldur opnuðum við dyrnar á fimmtudaginn og byrjuðum að keyra matseðilinn. Þetta hefur gengið mjög vel enn sem komið er og fólk er að detta hér inn í kaffi enda erum við á mjög góðum stað,“ segir Andrés Pétur.