Vill leita að samstarfsfleti

Stefna Landspítala - háskólasjúkrahúss þess efnis að yfirmenn hjá sjúkrahúsinu séu í 100 prósenta starfshlutfalli og sinni ekki öðrum lækningastörfum þess utan mun standa óbreytt í máli Tómasar Zoëga læknis, sem og annarra á spítalanum. Reynt verður að fá Tómas til að starfa áfram.

Þetta segir Magnús Pétursson, forstjóri LSH, um viðbrögð spítalans við nýföllnum dómi Hæstaréttar í máli Tómasar, sem fluttur var úr starfi yfirlæknis í stöðu sérfræðings á spítalanum. Héraðsdómur dæmdi þessa ákvörðun LSH ógilda, en Hæstiréttur taldi hana ólögmæta.

Magnús kveðst munu skrifa Tómasi bréf um hvernig spítalinn meti þá stöðu sem upp er komin og hvað LSH telji hægt að gera miðað við aðstæður nú.

"Við metum störf Tómasar mjög mikils og viljum mjög gjarnan að hann starfi hér," segir Magnús. "Hins vegar hefur stjórnin sett tiltekna stefnu í störfum yfirlækna. Dómurinn fjallar hvorki um þá stefnu né véfengir hana. En ég vil vita hvort hægt er að búa Tómasi einhverjar þær aðstæður á spítalanum sem hann getur unað við. Ég vil ræða það við hann."