Ferðamönnum fjölgaði um 5,4% fyrstu fjóra mánuði ársins

Erlendum ferðamönnum fjölgaði um 5,4% fyrstu fjóra mánuði ársins, samkvæmt talningum Ferðamálastofu sem fram fara í Leifsstöð. Þannig voru erlendir ferðamenn rúmlega 73.400 talsins samanborið við 69.700 erlenda ferðamenn á sama tímabili í fyrra en þetta kemur fram á vef ferðamálastofu.

Apríl var sérlega góður hvað fjölda ferðamanna varðar og hafa þeir aldrei verið fleiri á þessum árstíma, 25.300 talsins. Í mars var lítilsháttar samdráttur eða 5%. Í töflunni hér að neðan má sjá skiptingu ferðamanna eftir þjóðerni fyrstu fjóra mánuði ársins. Sé litið til helstu markaðssvæða þá voru Bretar flestir einstakra þjóða, eða tæplega 17 þúsund en mest fjölgun var frá Bandaríkjunum, 14,5%.

Af einstökum markaðssvæðum voru frændur okkar á Norðurlöndunum fjölmennastir eða rúmlega 20 þúsund. Fyrstu mánuðina er góð aukning frá Bandaríkjunum, Danmörku, Frakklandi, Hollandi, Japan, Þýskalandi og Kína. Nokkur fækkun er frá Svíþjóð, Bretlandi og Noregi. Að sögn Ársæls Harðarsonar forstöðumanns markaðssviðs Ferðamálastofu er ánægjulegt að sjá að enn er aukning ferðamanna yfir veturinn eins og stefnt er að. "Það er svo ekkert sem bendir til annars en að sumarið verði gott í ferðaþjónustunni." að sögn Ársæls.