300 milljóna borhola skilar engu

Reykjanesið með sínum rjúkandi hverum ber nafn með rentu. En brátt mun jarðhitasvæðið þar þjóna álframleiðslu. Þar er að rísa jarðgufuvirkjun sem verður nærri tvöfalt stærri en Kröfluvirkjun. Verkið hefur gengið hratt fyrir sig en ekki eru nema tuttugu mánuðir frá því Hitaveita Suðurnesja samdi um raforkusölu við Norðurál. Síðan þá hafa Jarðboranir borað hverja holuna á fætur annarri á svæðinu en öflugasti og nýjasti bor landsins, Geysir, er nýbyrjaður á holu númer fimmtán. Um leið er verið að leggja málmleiðslur þvers og kruss um svæðið, en þær liggja frá borholunum að stöðvarhúsinu þar sem gufuaflinu verður breytt í rafmagn.

Júlíus Jónsson, forstjóri Hitaveitu Suðurnesja, segir viðbúið að einhverjar borholur lukkist ekki. "Önnur þeirra sem er ekki að skila neinu er sú dýrasta. Hún fór í yfir 3.100 metra og hefur kostað 300 milljónir. Væntanlega verður hún ekki tengd, svo þetta er ekki áhættulaus bransi.

Heildarkostnaður við Reykjanesvirkjun  fer rétt yfir tíu milljarða króna. Þar starfa nú milli 150 og 200 manns að framkvæmdum, þriðjungur þeirra eru útlendingar. Aðalbyggingaverktaki er Eykt, og védlaverktaki er Framtak.

"Þeir hafa sammælst um að hafa Portúgali í vinnu því það virkar betur að vera með eina útlenda þjóð en að rugla mörgum saman," segir Geir Þórólfsson vélaverkfræðingur.

Tvær vélasamstæður hafa verið settar upp í stöðvarhúsinu, hvor með uppsett afl upp á 50 megavött. Það verður svo um miðjan marsmánuð sem þessar vélar fara að framleiða rafmagn, fyrst um sinn í tilraunaskyni en frá 1. maí eiga þær að skila rafmagni til Grundatanga.

Á Grundartanga er Norðurál samtímis að ljúka stækkun álversins úr 90 þúsund tonnum upp í 220 þúsund tonn. Stefnt er að því að byrjað verði að keyra upp fyrstu kerin þar nú í febrúar og viðbótin verði að fullu komin í gang í ágústmánuði.