Ráðherrar liðka fyrir umdeildu frumvarpi

Ráðherrar Framsóknarflokks og Sjálfstæðisflokks hafa náð samkomulagi um að gera breytingar á umdeildu frumvarpi iðnaðarráðherra um Nýsköpunarmiðstöð atvinnulífsins. Valgerður Sverrisdóttir iðnaðarráðherra kvaðst í samtali við NFS ekki vilja greina frá því í hverju breytingarnar fælust en vonaðist til að þær myndu liðka fyrir því að málið næði fram að ganga án þess að kollvarpa frumvarpinu. Hún sagði ofsagt að þetta þýddi að samkomulagsniðurstaða lægi fyrir milli stjórnarflokkanna enda ætti eftir að ræða málið við þingmenn. Einar Oddur Kristjánsson, sem er meðal þeirra sjálfstæðisþingmanna sem lögðust gegn málinu, kvaðst í dag hvorki hafa séð né heyrt um neitt samkomulag um málið.