Engar breytingar ráðgerðar

Gunnar Stefánsson, sviðsstjóri björgunarsviðs Landsbjargar fagnar tillögu Vilhjálms Þ. Vilhjálmssonar um afnám virðisaukaskatts á tækjakost björgunarsveitanna. Í máli Vilhjálms kom fram að ekki eigi að líta á rekstur sveitanna sem fyrirtækjarekstur en þetta sagði hann í ræðu sinni á sjómannadaginn.

Björgunarsveitir fá í dag niðurfelldan virðisaukaskatt og aðflutningsgjöld á bílum, bátum og öðrum tækjum. Björgunarsveitir þurfa hins vegar að borga virðisaukaskatt af fjarskiptatækjum og skyndihjálparbúnaði, en Gunnar telur mjög brýnt að fá það til baka.

Björgunarsveitirnar mótmæltu nýlega breytingu laga á Alþingi en þar lá frammi tillaga um að bílar sveitanna ækju um á litaðri olíu og þyrftu að borga kílómetragjald. Niðurstaðan er sú að björgunarsveitir þurfa ekki að borga kílómetragjald og segir Gunnar það skipta miklu þar sem um hundrað bíla sé að ræða og fjármögnun félaganna fari að mestu leyti fram í sjálfboðaliðavinnu.

Ármann Kr. Ólafsson aðstoðarmaður fjármálaráðherra segir engar áætlanir uppi um að breyta virðisaukaskattskerfinu.