Engin svartsýni þrátt fyrir rýra vertíð

Þau fáu loðnuskip sem enn eru að veiðum á þessari óvenju rýru vertíð, þar sem aðeins mátti veiða um 170 þúsund tonn, eru um það bil að slá botninn í hana. Nokkur eru búin með kvóta sína og hafa lagst við bryggju, önnur eru á landleið úr síðustu veiðiferð en nokkur eru enn að veiðum, sem ganga vel þegar bjart er af degi. Ekkert hefur frést af nýrri göngu norðvestur af landinu, eins og stundum hefur komið um þetta leyti og hleypt nýjum krafti í veiðarnar. Skipstjórnarmenn eru þó ekkert svartsýnir á framtíðina því þeir fagna því að Hafrannsóknastofnun og Hampiðjan skuli vera að gera rannsóknir á áhrifum veiða með flotvörpu, meðal annars með myndatöku neðansjávar.