Næst besti GTA leikurinn

Það gleyma því margir hvað Grand Theft Auto leikirnir hafa þróast mikið frá því að fyrst leikurinn kom út. Ég man enn eftir því að hafa burðast með hann á um 24 diskettum milli húsa, það voru reyndar margir komnir með skrifara þá, en ekki ég og félagi minn.

Það var í þriðja leiknum sem sjónarhorn leikmannsins breyttist og hjálpaði það leiknum mjög mikið. Eftir það kom út leikurinn Grand Theft Auto Vice City og var það sá sem olli byltingunni. Í honum var allt hægt og umhverfi leiksins alveg frábært; Miami borg árið 1984. Í leiknum Grand Theft Auto Vice City Stories, er notast aftur við sama umhverfi, en ný aðalhetja er lent og auðvitað fylgir henni ný saga.

Hetjan heitir Vic Vance og í upphafi leiksins er hann hermaður. Eftir að hafa hjálpað óheiðarlegum yfirmanni í einhverju braski er Vic svo rekinn úr hernum og nú reynast góð ráð dýr.

Hægt og rólega þarf maður að vinna sig upp í glæpaheiminum, fyrst með ómerkilegum verkefnum á borð við að kúga búðareigendur en því lengra sem komið er verða verkefnin stórbrotnari og æsilegri. Eins og í fyrri leikjum er takmarkið að verða glæpakonungur borgarinnar, búa í risahúsi og eiga nóg af gúmmelaði til hliðar.

Þessi leikur er tvímælalaust næst besti GTA leikurinn á eftir San Andreas að mínu mati. í fyrsta skipti er hægt að slást eitthvað fyrir alvöru í leiknum, en í fyrri leikjum gat maður aðeins kýlt liðið í munninn. Söguþráðurinn er furðu heillandi og fjörugur en það hefur kannski verið sterkasta hlið Rockstar-leikjanna hingað til. Tónlistin er frábær, en hægt er að velja milli ótal útvarpsstöðva sem spila tónlist sem var vinsæl árið 1984.

Einnig er hægt að hlusta á spjallþætti sem eru massíft fyndnir. Þessi leikur er langt um betri en Liberty City Stories sem kom út á PSP í fyrra. Leikurinn er aðeins kominn út á PSP en er vonandi væntanlegur í aðrar tölvur. Ég er sáttur, verulega sáttur og með gott gúmmelaði til hliðar.Dóri DNA