Stjórnarformaður Árs og dags hefur átt í samningaviðræðum um kaup á Fróða

Stjórnarformaður Árs og dags, sem meðal annars gefur út Blaðið, hefur átt í samningaviðræðum um kaup á tímaritaútgáfunni Fróða.

Samkvæmt heimildum NFS fer Sigurður G. Guðjónsson, stjórnarformaður Árs og dags ehf., fyrir hópi hlutahafa sem átt hafa í samningaviðræðum um kaup á Fróða og er samningaferlið langt á veg komið. Vonir standa til að hægt verði að ganga frá kaupnum eftir helgi en enn ber þó eitthvað á milli. Tímaritafyrirtækið Fróði er í eigu Kvos sem einnig á Prentsmiðjuna Odda og Gutenberg.

Sigurður sagði í samtali við NFS að hann hefði rætt við forsvarmenn fyrirtækisins. Hann hafi sýnt áhuga á fyrirtækinu en hann sé þó ekki að ganga frá neinum kaupum.

Fróði gefur út sjö tímarit en ritstjórum þriggja þeirra Séð og heyrt, Vikunnar og Húsa og hýbýla, var öllum sagt upp í síðustu viku. Ástæður uppsagnanna voru sagðar tap á útgáfu og tilkynnt að henni verði hætt eftir þrjá mánuði ef ekki verður breyting þar á.

Ekki náðist í Þorgeir Baldursson, forstjóra Kvosar, vegna málsins.