Ártúnsskóli fær Íslensku menntaverðlaunin í ár

Ártúnsskóli fékk íslensku Menntaverðlaunin í ár sem Hr. Ólafur Ragnar Grímsson, forseti Íslands, afhenti í kvöld. Alls voru veitt verðlaun í fjórum flokkur en þrír grunnskólakennarar fengu einnig viðurkenningu fyrir störf sín.

Þetta er í annað sinn sem íslensku menntaverðlaunin eru veitt. Verðlaunin eru einkum bundin við grunnskólastarfið og eru veitt í fjórum flokkum. Að þessu sinni fékk Ártúnsskóli verðlaun fyrir að hafa sinnt vel nýsköpun og lagt grunn að farsælu fræðslustarfi. Ellert Borgar Þorvaldsson skólastjóri, hefur stýrt skólanum allt frá upphafi árið 1987. Hann segir starfsfólk skólans leggja áherslur á hlýlegt og gott viðmót og náið samstarfs milli kennara, nemenda og foreldra. Í könnunum sem hafa verið gerðar hefur ánægja foreldra með skólann mælst allt að 90%.

Sólrún Harðardóttir, endurmenntunarstjóri í Hólaskóla, fékk viðurkenningu fyrir að hafa stuðlað að nýjungum í skólastarfi en hún hefur samið fjölda námsbóka um lífríki og náttúru Íslands. Sólveig Sveinsdóttir kennari í Laugarnesskóla fékk viðurkenningu fyrir að hafa skilað merku ævistarfi. Hún var fjarverandi og tók sonur hennar við viðurkenningunni. Þá fékk Íris Róbertsdóttir, kennari í Hamarsskóla í vestmannaeyjum, viðurkenningu fyrir að hafa í upphafi starfsferil síns sýnt hæfileika og lagt alúð í starf sitt. Íris þykir hafa lagt miklar áherslur á að koma til móts við þarfir hvers og eins nemanda síns hvort sem þeir eru fatlaðir eða ófatlaðir.