Bolvíkingar fiska vel

Þrír aflahæstu smábátar landsins frá áramótum og til vertíðarloka ellefta maí, eru allir frá Bolungarvík. Á tímabilinu réru þeir um það bil hundrað róðra hver, fengu allir vel á sjötta hundrað tonn, eða samanlagt rúmlega sextán hundruð tonn, sem er rúmlega tólf tonn upp á hvern dag hjá bátunum í heild.

Tveir menn róa á hverjum báti og yfirleitt eru fimm menn í landi að beita línuna fyrir hvern bát þannig að mannskapurinn á bakvið þennan sameiginlega árangur er hátt í 25 manns. Bátarnir heita Guðmundur Einarsson, Hrólfur Einarsson og Guðbjörg, bera allir einkennisstafina ÍS og eru allir af gerðinni Cleopatra.