Litlar líkur á harðri lendingu í íslensku efnahagslífi

Í vefriti fjármálaráðuneytisins í dag eru ræddar líkur á harðri lendingu efnahagslífsins. Hörð lending er skilgreind sem djúp niðursveifla sem einkennist af ört vaxandi atvinnuleysi og vanskilum heimila og fyrirtækja. Forsvarsmenn fjármálaráðuneytisins telja litlar líkur á harðri lendingu.

Ójafnvægið í þjóðarbúskapnum er sagt vera tímabundið ástand, innflutningur muni dragast saman á næsta ári þegar stóriðjuframkvæmdum lýkur og útflutningur aukast. Líklegt er að innflutningur heimilanna dragist einnig saman nú þegar krónan veikist. Verðbólguaukning hefur stafað að miklu leyti af hækkandi fasteignaverði, en hækkun hefur verið að minnka síðan í ágúst á síðasta ári. Fyrst um sinn mun þó verðbólga halda áfram að aukast en líklega lækka vorið 2007.

Í vefritinu segir einnig að sagan hafi sýnt að íslensk heimili og fyrirtæki bregðist skynsamlega við sveiflum í gengi krónunnar. Þrátt fyrir að skuldir heimilanna séu miklar eru þó eignir þeirra þrefalt hærri en skuldirnar. Bankarnir hafa auk þess góða eiginfjárstöðu, mikið fé í erlendri mynt sem eykur stöðugleika þeirra.