Hundruð nýrra botndýrategunda hafa fundist við landið

Fjörutíu prósent af þeim botndýrum sem fundist hafa við Ísland í svokölluðu BIOICE-botndýraverkefni hafa ekki fundist áður hér við land. Þetta kemur fram í nýrri ársskýrslu Hafrannsóknarstofnunarinnar sem unnið hefur að verkefninu ásamt nokkrum aðilum.

Síðasta leiðangri verkefnisins lauk fyrir tveimur árum og hefur síðan verði unnið að flokkun dýranna. Alls fundust 1909 botndýrategundir og hafa 29 þeirra ekki fundist áður í heiminum. Enn fremur kemur fram í ársskýrslunni að stofnunin hafi verið rekin með um 90 milljóna króna halla og segir í formála skýrslunnar að tryggja þurfi aukið rekstrarfé fyrir stofnunina svo unnt verði að sinna aðkallandi verkefnum betur en nú sé gert.