Farþegi sem réðst á leigubílstjóra dæmdur í fimm ára fangelsi

Hæstiréttur dæmdi í dag Guðbjart J. Sigurðsson í fimm ára fangelsi fyrir tilraun til manndráps, auk greiðslu skaðabóta upp á tæplega 700.000 krónur. Hann er dæmdur fyrir að veita leigubílstjóra stórhættulegan áverka á hálsi með eggvopni.

Atvikið átti sér stað aðfaranótt 27. júlí 2004 en þá ók leigubílstjórinn fjórum farþegum í Vesturbæinn. Eitthvað virðist farþegunum hafa sinnast um greiðslu fyrir aksturinn, en ákærði fór út úr bifreiðinni og teygði sig inn um opinn glugga við bílstjórasætið og lagði hníf til bílstjórans. Hann flýtti sér út úr bílnum til að leita sér aðstoðar en farþegarnir hlupu í burtu.

Málið dæmdu Gunnlaugur Claessen, Hrafn Bragason, Ingibjörg Benediktsdóttir og Markús Sigurbjörnsson, en Jón Steinar Gunnlaugsson skilaði sératkvæði. Hann taldi málið ósannað og vildi sýkna Guðbjart.