Stefnir í vinnustöðvun á Keflavíkurflugvelli

Enn er stál í stál í deila starfsfólks og stjórnenda Flugþjónustunnar á Keflavíkurflugvelli. Samkvæmt upplýsingum NFS hafa fundir framkvæmdastjóra með starfsmönnum í morgun ekki skilað tilætluðum árangri og komið í veg fyrir vinnustöðvun í fyrramálið.

Gunnar Olsen, framkvæmdastjóri Flugþjónustunnar, hefur átt fundi með starfsmönnum hjá öllum deildum í morgun til að ræða við þá um óánægju þeirra með kaup og kjör og vinnuaðstöð. Á fundunum hefur hann reynt að afstýra boðaðri vinnustöðvun starfsfólks milli klukkan fimm og átta í fyrramálið, á háannatíma.

Samkvæmt upplýsingum NFS mun hafa soðið upp úr á fyrstu fundum í morgun þar sem framkvæmdastjórinn hafi ekki viljað ræða um kjaramál og aðeins vísað til samnings aðila vinnumarkaðarins sem undirritaður var fyrir helgi. Hann hvatti einnig starfsmenn til að hætta við boðaðar aðgerðir og standa þar með vörð um fyrirtækið sitt. Einnig mun hafa komið fram á fyrsta fundið að búið væri að baktryggja innritun í fyrramálið ef af aðgerðum verður.

Eftir fundi með Gunnari í morgun var þegar boðað til neyðarfundar þar sem allir viðstaddir greiddu atkvæði með aðgerðum á morgun.

Samkvæmt heimildum NFS er nú enn meiri samstaða meðal starfsfólks og ef bótakrafa verið gerð á hendur þeim eftir aðgerðirnar þá ætli allir starfsmenn að kasta frá sér aðgangskortum og ganga út af vinnustaðnum.

Aðgerðirnar, ef af þeim verður, munu hafa áhrif á ferðir um tvö þúsund farþega til og frá landinu. Starfsmenn sem NFS ræddi við í morgun segja erfitt að ráðleggja farþegum hvernig þeir eigi að haga áætlunum sínum á morgun þegar búast má við töfum. En verði af aðgerðum, sem allt bendir til, má búast við að áætlanir riðlist fram eftir degi.

Ekki náðist stjórnendur Flugþjónstunnar í morgun.