Kattholt yfirfullt og fjárvana

Kattholt er yfirfullt og fjárvana. Formaður Kattavinafélags Íslands á í deilum við nágrannasveitarfélögin um greiðslur fyrir dýrin.

Sífellt færist í aukana að kettir séu skildir eftir í pappakössum á þröskuldi Kattholts auk þess sem kettir finnast á vergangi hingað og þangað um höfuðborgarsvæðið.

Kattavinafélag Íslands hefur staðið í stappi við nágrannasveitarfélög Reykjavíkur um að borga með köttum sem komið er með þaðan. Enn bíður Kattholt eftir svari frá bæjarstjórn Hafnarfjarðar við bréfi sem sent var þann 9. maí síðastliðinn. Hafnarfjarðarbær hefur ekki greitt með óskilaköttum úr sveitarfélaginu sem komið er með í Kattholt.

Kostnaður Kattholts við dýrin er töluverður.

Samkvæmt lögum ber sveitarfélögum að sjá um dýr í 7 daga. Eftir sjö daga fellur réttur eiganda niður og leyfilegt er að lóga dýrunum. Starfsfólk Kattholts hefur þó tregðast við að lóga góðum dýrum heldur reynt eftir fremsta megni að finna þeim heimili. Kostnaður Kattholts felst í móttöku, umönnun og ráðstöfun kattanna auk þess sem kettir eru ávallt ormahreinsaðir við komuna í Kattholt. Stærstur hluti þessa kostnaðar er greiddur af Kattavinafélagi Íslands.

Reykjavík og Mosfellsbær til dæmis hafa þó borgað fyrstu sjö dagana auk þess sem borgað er fyrir svæfingu dýranna.

Hratt gengur á sjóði Kattholts sem koma frá félagsmönnum Kattavinafélagsins og dýravinum. Sigríður Heiðberg formaður Kattavinafélags Íslands sér ekki hvernig Kattholt á að geta staðið undir sér til framtíðar.