Hinn ófullkomni glæpur

Hópur fólks braust inn í sumarbústað í Grímsnesinu um helgina til þess að halda þar partí. Fólkið hafði ekkert á brott með sér en skildi eftir sig bjórdósir - og myndavél með myndum af fólkinu í gleðskapnum. Með svo þægileg sönnunargögn í höndunum var lögreglan á Selfossi ekki lengi að hafa uppi á sökudólgunum.

Einnig var brotist inn í tvo aðra bústaði í Grímsnesinu og einn við Úlfljótsvatn en ekki er vitað um hvort sama fólk var þar að verki, þar sem engar myndavélar fylgdu þeim innbrotum.