Framsóknarflokkurinn lagður í einelti

Sjálfstæðismenn og Framsóknarmenn hafa náð samkomulagi um áframhaldandi samstarf í bæjarstjórn Kópavogs. Oddviti Framsóknarflokksins segir flokkinn hafa orðið fyrir einelti en hann segir forystu flokksins bera ákveðna ábyrgð á slöku gengi og býður spenntur eftir að sjá hvernig hún ætlar að axla þá ábyrgð.

Meirihluti Sjálfstæðisflokks og Framsóknarflokks í Kópavogi hélt velli í sveitarstjórnakosningunum á laugardaginn. Framsóknarflokkurinn tapaði þó tveimur mönnum og hefur nú aðeins einn mann en Sjálfstæðisflokkurinn fékk fimm menn kjörna.

Flokkarnir hafa náð samkomulagi um að halda meirihlutasamstarfi sínu áfram og verður málefnasamningur lagður fyrir fulltrúaráð flokkanna á miðvikudag. Gunnar Birgisson verður bæjarstjóri og Ómar Stefánsson, eini framsóknarmaðurinn í bæjarstjórn verður forseti bæjarráðs.

Ómar segir að þrátt fyrir að gengi Framsóknarflokksins í Kópavogi hafi verið slakt hafi þeir ekki talið tímabært að slíta samstarfinu. Þeir hafi metið það sem svo að bæjarbúar hafi ekki verið að hafna meirihlutanum. Hann segir þó ljóst að framsóknarmenn verði að skerpa sig og sýna að þær framfarir sem orðið hafa í bænum séu líka þeirra verk.

Ómar telur að vissu leyti sé verið að refsa sveitarstjórnamönnum fyrir verk ríkisstjórnarinnar í þessum kosningum. Það hafi verið þungt undir fæti að koma þeirra verkum að í kosningunum. Þeir hafi fundið að kjósendur vildu helst ræða mál sem snéru að ríkisstjórninni frekar en sveitarstjórnarmál.

Ómar segir forystuna hafa sagt að hún axli ákveðna ábyrgð og hann býði spenntur eftir því hvernig þeir tækla það. Hann segist ekki kunna miklar skýringar á því afhverju fylgi Framsóknarflokksins sé að dala á landinu öllu. Þetta sé ákveðinn dómur á stjórnmálin á landsvísu en auk þess sé flokkurinn að verða fyrir einelti og áreiti. Það sjáist glöggt á kosningabaráttu Vinstri-grænna, sem sé barnaleg. Þeir hafi dreift barmerkum sem á stendur aldrei kaus ég Framsókn og það sé ekkert annað en einelti.