Bilun í stjórnbúnaði ljósabekks olli bruna

Nú er ljóst að eldurinn sem kom upp í Akureyrinni úti fyrir Látrabjargi á laugardag kviknaði vegna bilunar í stjórnbúnaði ljósabekks sem staðsettur var í frístundarými skipsins. Tveir menn létust í brunanum.

Það var þriðja tímanum á laugardag sem sent var út neyðarkall frá Akureyrinni EA-110 þar sem hún var stödd um 75 sjómílur norðvestur af Látrabjargi. Þyrla Landhelgisgæslunnar var send á staðinn með slökkviliðsmenn um borð en þegar komið var að skipinu hafði skipverjum tekist að slökkva eldinn. Þykja þeir hafa unnið þrekvirki með því.

Skipið kom til hafnar í Hafnarfirði í gærmorgun og hófu lögreglumenn úr Hafnarfirði og Reykjavík ásamt rannsóknarnefnd sjóslysa strax rannsókn á brunanum. Sú rannsókn hefur nú leitt í ljós að eldsupptök voru út frá rafnmagni í stjórnborði ljósabekks sem var að finna í frístundarými skipverja. Að sögn Jóns Ingólfssonar, framkvæmdastjóra Rannsóknarnefndar sjóslysa, var enginn í ljósabekknum þegar eldurinn kom upp og heldur ekki í rýminu þar sem hann er.

Hins vegar voru tveir menn í káetum við hliðina á rýminu þar sem ljósabekkurinn var. Vegna mikils hita bráðnuðu plasthúðaðar plötur í ljósabekkjarrýminu og við það mynduðust eiturgufur sem talið er að hafi dregið mennina tvo til dauða. Rannsókn hefur einnig leitt í ljós að mikill hiti og reykur var í vistarverum áhafnarinnar og eldhúsi vegna eldsins og því þykir það mikið afrek að skipverjum á Akureyrinni hafi tekist að slökkva hann.

Að sögn Jóns er rannsókn málsins þó ekki lokið með þessu því það þarf meðal annars að kanna af hvaða tegund ljósabekkurinn var, en hann bráðnaði algjörlega í brunanum. Óvíst er hvenær þeirri rannsókn lýkur.

Sem fyrr segir létust tveir menn í brunanum í Akureyrinni og hafa ættingjar þeirra mælst til þess að ekki verði greint frá nöfnum þeirra í fjölmiðlum.