Keppir í kappakstri

Gumball 3000, kappakstur ríka og fræga fólksins, hófst í London í dag. Jón Ásgeir Jóhannesson er meðal keppenda og fetar þar í fótspor ekki ómerkari kappa en Burt Reynolds, Hugh Hefners og fjölmargra stjarna. Kappaksturinn er þó ekki viðurkennd keppni svo keppendur geta auðveldlega komist í kast við lögin, virði þeir ekki hraðatakmarkanir á leið sinni.

Gumball 3000 kappaksturinn er nú haldin í sjöunda sinn og í ár eru 240 þátttakendur skráðir til leiks eða 120 lið. Jón Ásgeir Jóhannesson, forstjóri Baugs group, og félagi hans Guðmundur Ingi Hjartarson, eigandi Netheims, munu keppa á fjögurra dyra Bentley sem er sagður ansi hraðskreiður. Þeir félagar verða í góðum félagsskap Pamelu Anderson, Hugh hefner, Snoop Dog, Adrien Broady og fjölmargra annarra leikara, tónlistarmanna og annarra stjarna. Það er ekki fyrir hvern sem er að keppa í kappakstrinum því þáttökugjaldið er um fimm og hálf milljón íslenskra króna. Fjölmargir styrktaraðila koma að keppninni, meðal annars Icelandair.

Keppendur munu næstu átta daga þeytast milli þriggja heimsálfa og átta þjóðlanda í þremur áföngum. Keppendur mega velja leiðir sínar sjálfir en það fylgir þó böggull skammrifi því keppendur eiga það á hættu að verða stöðvaðir af lögreglu hvar sem er. Hraðasektir, ökuleyfissvipting og jafnvel fangelsisdómur er eitt af því sem keppendur gætu átt yfir höfði sér ef þeir halda sig ekki á mottunni. Það eru þó engin verðlaun í boði, en allir keppendur fá bronsaða brjóstmynd af leikaranum Burt Reynolds en hann lék í kvikmyndinni Cannonball Run, þaðan sem hugmyndin af kappakstrinum er komin.

Þess má geta að áhugasamir geta fylgst með keppninni á netinu en Jón Ásgeir og Guðmundur Ingi eru númer 56 í keppninni.