Íhuga málaferli

Aðstandendur tónlistarhátíðarinnar Reykjavík Trópík íhuga höfða mál á hendur þeim sem ábyrgir eru en ekki fékkst skemmtanaleyfi fyrir tónleikana sem vera áttu í kvöld. Hátíðin hefur verið færð á skemmtistaðinn Nasa við Austurvöll þar sem tónleikar munu fara fram í kvöld.

Tónlistarhátíðin hófst á föstudaginn en þremur tímum áður en hátíðin átti að hefjast kom í ljós að leyfi myndi ekki fást fyrir tónleikahaldi í risatjaldinu kvöld. Aðstandendur hátíðarinnar höfðu áður fengið neitun hjá lögreglustjóranum í Reykjavík en áfrýjuðu umsókninni til Dómsmálaráðuneytis sem staðfesti ákvörðun lögreglustjóra. Samkvæmt lögum eru dansleikir eða einkasamkvæmi á opinberum veitingastöðum bönnuð á Hvítasunnudag. Í lögum um helgidagafrið, segir þó að listsýningar, tónleikar, leiksýningar og kvikmyndasýningar séu undanþegnar banninu að því tilskildu að starfsemin hefjast ekki fyrr en eftir klukkan þrjú. Aðstandur hátíðarinnar eru að kanna réttarstöðu sína og munu jafnvel leita réttar síns á grunvelli laganna en þau sjá fram á að verða fyrir fjárhagslegu tjóni vegna þessa.

Samkvæmt upplýsingum lögreglunnar í Reykjavík fór hátíðin vel fram á föstudag og laugardag. Lögregla hefur ekki þurft að hafa afskipti af hátíðinni eða gestum hennar, utan þess að íbúi í nágrenninu kvartaði undan hávaða eftir miðnætti á föstudag. Tónleikarnir hófust á NASA um klukkan sex og munu þeir standa fram eftir nóttu, en engar hömlur hafa verið settar á tónleikahald á NASA í kvöld.