Steingrímur J. Sigfússon ræðumaður Alþingis

Liðsmenn samtakanna JCI, Junior Chamber International, kusu í dag Steingrím J. Sigfússon besta ræðumann eldhúsdags Alþingis. Flokksbróðir hans í Vinstrihreyfingunni - grænu framboði, Ögmundur Jónasson, hafnaði í öðru sæti. Þetta er í þriðja sinn sem félagar í JCI kjósa ræðumann Alþingis, til að vekja athygli á mikilvægi þess að geta komið máli sínu vel til skila.

Í þriðja sæti hafnaði Ingibjörg Sólrún Gísladóttir, Samfylkingunni en fjórða og fimmta sætið skipuðu þingmenn frjálslyndra, þeir Magnús Þór Hafsteinsson og Sigurjón Þórðarson.

Að sögn JCI var keppnin að þessu sinni óvenju jöfn en þó náðu þingmenn stjórnarandstöðunnar áberandi betri árangri en þingmenn stjórnarflokkanna. Stjórnarandstæðingar náðu allir meira en 200 stigum, en ræðumenn voru dæmdir eftir sömu reglum og tíðkast í ræðukeppnum hérlendis og erlendis.