Framsókn furðar sig á ummælum um Sundabraut

Framsóknarflokkurinn í Reykjavík lýsir furðu sinni á ummælum oddvita Sjálfstæðisflokksins í borginni í Fréttablaðinu í dag um að framkvæmdum við Sundabraut sé sjálfhætt í bili vegna stöðu efnahagsmála. Í tilkynningu frá flokknum segir að það sæti undrun að oddvitinn skuli ekki meta þessa mikilvægu samgöngubót meira en raun beri vitni, og verði það að teljast kaldar kveðjur til Reykvíkinga sem hafa beðið eftir Sundabraut allt of lengi.

Framsóknarflokkurinn minnir á að ríflega átta milljarðar króna af söluandvirði Símans liggi inni á bókum ríkissjóðs vegna framkvæmdar við Sundabraut. „Við teljum að frekar hefði mátt auka útgjöld til samgöngumála á höfuðborgarsvæðinu fremur en draga úr mikilvægum framkvæmdum í höfuðborginni þar sem langstærsti hluti bílaumferðar í landinu er. Lagning Sundabrautar alla leið yfir á Kjalarnes er einhver arðsamasta vegaframkvæmd sem í boði er, auk þess sem hún er nauðsynleg út frá umferðaröryggi. Því hlýtur sú spurning að vera áleitin, hvort oddviti Sjálfstæðismanna í borgarstjórn telji virkilega að engar aðrar framkvæmdir á vegum ríkisins ættu frekar að bíða," segir í tilkynningunni.

Þá segir í tilkynningu B-listans (Framsóknarflokksins í Reykjavík) að oddviti Samfylkingarinnar hafi með ummælum sínum um einfalda Sundabraut komið áformum um framkvæmdirnar í uppnám, þar sem hann hafi m.a. kynnt hugmyndir sem ekki hafi farið í mat á umhverfisáhrifum og myndu því sjálfkrafa þýða nokkurra ára frestun á framkvæmdum. „Nú kemur oddviti Sjálfstæðismanna fram og telur framkvæmdum sjálfhætt í bili. Er því greinilegt að Sundabraut er ekki ofarlega á forgangslista Sjálfstæðisflokks og Samfylkingarinnar í borgarstjórn. B-listinn hefur hins vegar kynnt hugmyndir sínar um Sundabraut í botngöngum á ytri leið og er þess albúinn að leiða verkið án frekari tafa, borgarbúum til hagsbóta. Tími athafna er runninn upp, frekari tafir eru ekki ásættanleg," segir í tilkynningunni.