Gerðu áhlaup á færeyskan togara

Fjórir skipverjar af varðskipinu Óðni réðust til uppgöngu í færeyskan togara suðaustur af landinu í gærkvöldi vegna meintra brota skipstjórans.

Togarinn var þá á níu sjómílna ferð 130 sjómílur suðaustur af Eystra Horni og hafði skipstjórinn ítrekað neitað að far að fyrirmælum skipherrans um að stöðva togarann. Skipverjar veittu varðskipsmönnum enga mótspyrnu, eftir að þeir birtust óvænt um borð í togaranum og tóku þeir við stjórn hans. Þyrla gæslunnar var svo send með tvo stýrimenn, sem sigur niður í Óðinn í nótt og héldu þaðan á gúmmíbátum út í togarann og leystu hina af. Þeir stjórna nú skipinu áleiðis til Eskifjarðar þar sem mál skipstjórans verður tekið fyrir. Óðinn var staddur þarna af tilviljun í sinni síðustu sjóferð í kurteisisheimsókn til Bretlands til að minnast drukknaðra breskra sjómanna á Íslandsmiðum. Í morgunsárið var stefnan tekinn þangað á ný.

Um borð í Óðni er meðal annarra Georg Lárusson forstjóri Landhelgisgæslunnar. Á 46 ára ferli sínum tók Óðinn þátt í öllum þorskastríðunum við Breta. Eftir heimkomuna frá Bretlandi verður skipinu lagt. Færeyski togarinn Sancy er hinsvegar væntanlegur til Eskifjarðar upp úr hádegi í dag. Hann hét áður Hvannaberg, og var gerður út frá Ólafsfirði.-