Allar ábendingar skoðaðar

Undirbúningur og staða deilskipulags nýs sjúkrahúss við Hringbraut var kynnt á opnum fundi í Ráðhúsinu fyrir helgi.

Ríflega fimmtíu manns mættu á fundinn og komu fram fjölmargar spurningar og athugasemdir frá starfsfólki Landspítalans og íbúum nágrennisins.

Alfreð Þorsteinsson, formaður framkvæmdanefndar, segir að helstu athugasemdirnar hafi komið frá íbúum Smáragötu og Laufásvegar um hæð og legu þeirra bygginga sem munu rísa á vesturhluta lóðarinnar. Einnig hafi starfsfólk komið með margar gagnlegar ábendingar. Ég lýsti því yfir í lok fundarins að allar þessar ábendingar yrðu skoðaðar og síðan verður bara vinnunni haldið áfram, segir Alfreð.

Guðmundur Gunnarsson arkitekt greindi frá þeim athugasemdum sem þegar höfðu komið fram en þær voru meðal annars staðsetning bráðamóttökunnar og bætt tengsl barnaspítala og kvennadeildar við bráðamóttöku.

Á fundinum var verkefnavefur um verkefnið opnaður þar sem almenningur getur fylgst með framvindunni, slóðin er: www.haskolasjukrahus.is.