Búferlaflutningar fyrstu þrjá mánuði ársins

Fyrstu þrjá mánuði ársins fluttust til landsins 2.574 manns á meðan 798 fluttust á brott. Landsmönnum fjölgaði af þessum orsökum um nær átján hundruð manns á tímabilinu. Þetta kemur fram í bráðabirgða­upplýsingum um búferlaflutninga fyrsta ársfjórðungs, sem Hagstofan hefur unnið fyrir fjármála­ráðuneytið.

Stærsti hópur aðfluttra frá út­löndum hefur flutt á höfuðborgarsvæðið, eða um átta hundruð manns, en tæplega sjö hundruð manns fluttu til Austfjarða.

Það vekur athygli þegar tölur um flutninga fólks innanlands eru skoðaðar að höfuðborgarsvæðið er á ný farið að taka á móti fleirum en þaðan flytja. Til samanburðar fluttust örlítið fleiri frá svæðinu innanlands en til þess á síðasta ári. Suðurland og Suðurnes fá einnig til sín fólk með þessum hætti en í öðrum landshlutum fækkar fólki vegna flutninga innanlands. Fækk­un af þeim orsökum á einnig við um Austurland. Var raunar einnig svo í fyrra í flestum sveitarfélögum öðrum en á Fljótsdalshéraði. Uppbygging stóriðjunnar eystra er því enn ekki farin að hafa teljandi áhrif á íbúaþróunina.