Eldsvoði á hóteli Gyllenhaal-systkina

Gyllenhaal-systkinin vinsælu, Jake og Maggie, komust í hann krappann í vikunni þegar þau lentu í eldsvoða á hóteli sem þau dvöldust á í Kaliforníu. Hótelið, Manka’s Inverness Lodge, stendur við San Franciscoflóa og nýtur töluverðra vinsælda hjá fræga fólkinu sem flykkist þangað til að slaka á.

Karl Bretaprins var til að mynda gestur hótelsins á síðasta ári og Gyllenhaal-systkinin hafa oft sótt það heim.

Jake Gyllenhaal, sem barðist við náttúruöflin í myndinni The Day After Tomorrow, var liðtækur í baráttunni við eldinn og hjálpaði Daniel DeLong, einum eiganda hótelsins, meðal annars að bjarga innanstokksmunum. Einn skáli brann til kaldra kola, en aðrar eignir á svæðinu voru óskemmdar. Enginn slasaðist í eldsvoðanum, sem má teljast mikil mildi þar sem átta manneskjur dvöldust í umræddum skála.